Aðstandendur hátíðarinnar, listafólk, skipuleggjendur og stjórn ásamt hirðskáldi hátíðarinnar kom saman og tók á móti þessum virðingarvotti.

Hér á eftir er ávarp sem flutt var við móttöku verðlaunana.   

Við móttöku mannréttindaverðlauna Reykjavíkurborgar

 í Höfða, 16. maí 2012

Þakkarávarp framkvæmdastýru Listar án landamæra

Kæru  Borgarstjóri, borgarstjórn, mannréttindaráð Reykjavíkurborgar og kæru vinir sem eruð hér saman komin í dag.

Fyrir hönd Listahátíðarinnar Listar án landamæra  þakka ég kærlega þennan heiður. Okkur þykir mjög vænt um þennan virðingarvott sem okkur er sýndur

Ég tek á móti þessum verðlaunum fyrir hönd allra þeirra sem hafa komið að hátíðinni síðustu 10 árin og gert hana að því sem hún er í dag.  Listafólk, skipuleggjendur og styrktaraðilar ykkar er heiðurinn.

List án landamæra er grasrótarhátíð sem á tilveru sína að þakka  skapandi fólki. Hún er hátíð þess mögulega,hátíð margbreytni og tækifæra fyrir alla. 

Í þessari grasrót hafa tekið þátt fjölmargir aðilar, samtök, hópar og einstaklingar um allt land.  Í stjórn hátíðarinnar eru fulltrúar Landssamtakana Þroskahálpar, Hins hússins, Öryrkjabandalags Íslands, Átaks, félags fólks með þroskahömlun, Fjölmenntar, símenntunar og þekkingarmiðstöðvar, Bandalags íslenskra listamanna og Miðstöð símenntunar á Suðurnesjum.

Markmið hátíðarinnar er að auka gæði, gleði, aðgengi, fjölbreytni og jafnrétti í menningarlífinu. Við viljum koma list fólks með fötlun á framfæri og koma á samstarfi á milli fatlaðs og ófatlaðs listafólks. 

Sýnileiki ólíkra einstaklinga er nefnilega afar mikilvægur, bæði í samfélaginu og í samfélagsumræðunni því hann hefur bein áhrif á jafnrétti og jafnræði á öllum sviðum.

Fögnum fjölbreytileikanum í stað þess að fylgja

sjálfkrafa svokölluðu normi og samþykkja óskrifaðar reglur samfélagsins gagnrýnislaust.

Hellum okkur í að endurvinna viðurkenndar hugmyndir og brjótum upp rammana þvi að rammar normsins geta háð  okkur án þess að við verðum þess vör og svipt okkur möguleikanum til þess að sjá nýja hluti, nýjar leiðir og nýja sköpun. 

Við sem erum hér í dag getum tekið þá ákvörðun með pompi og pragt að setja upp gagnrýnisgleraugun góðu og endurmeta. Við getum ákveðið að rýna til gagns  og leita markvisst að tækifærunum sem búa í okkur sjálfum en ekki takmörkunum og gerum það sama við aðra.

Fjölbreytnin í mannlífinu og í manneskjunum, listunum og lífinu  er kostur sem nýtist okkur til nýrra uppgötvana og betra og skemmtilegra lífs.

Á hátíðinni í ár var ung kona sem veitti mér mikinn innblástur og mig langar að segja ykkur frá henni. Þessi unga kona heitir Ásta Hlöðversdóttir og tók hún þátt í söngkeppni á dagskrá Listar án landamæra.

Hún fór á kostum og vakti mikla lukku meðal áheyrenda. Það sem er svo frábært við þátttöku Ástu er að rödd hennar heyrðist ekki því hún er með lömuð raddbönd. Hún túlkaði lagið á annan hátt og gerði það fantavel. 

Ásta er fyrirmynd og kennir okkur að sjá tækifæri en ekki takmarkanir.

Það þarf ekki rödd til að syngja, ekki fætur til að dansa heldur er þetta allt spurning um viðhorf.

Takk kærlega fyrir þessa  fallegu og góðu viðurkenningu og ykkar góða starf hjá mannréttindaráði og takk fyrir stuðninginn sem er okkur mikil hvatning.

Reykjavík, 16.maí 2012

Margrét M. Norðdahl

Hér er tengill á viðtalið:

http://www.ruv.is/sarpurinn/kastljos/10052012/list-an-landamaera-2012

Hér eru svo svipmyndir frá sýningunni Fólk í mynd sem stendur yfir í Norræna húsinu

http://www.ruv.is/sarpurinn/frettir/02052012/lokaskot-folk-i-mynd

Flott listafólk!

Myndin er af Huldu Vilhjálmsdóttur og Gígju Thoroddsen, listakonum, við opnun sýningarinnar Fólk í mynd.

Listahátíðin List án landamæra hefur nú staðið yfir frá 18.apríl. Á tímabilinu verið á sjötta tug viðburða um allt land.

Um helgina eru sýningarlok á nokkrum sýningum sem enginn ætti að láta framhjá sér fara.
Í Norræna húsinu lýkur sýningunni Fólk í mynd, samsýningu 11 listamanna. Þau eru Aron Kale, Bergþór Morthens, Erla Björk Sigmundsdóttir, Gígja Thoroddsen – GÍA, Hermann Birgir Guðjónsson, Hulda Vilhjálmsdóttir, Ísak Óli Sævarsson, Kristján Ellert Arason, Ólöf Dómhildur Jóhannsdóttir, Sigrún Huld Hrafnsdóttir og Snorri Ásmundsson. Leiðsögn verður um sýninguna á laugardaginn kl.15.

Sýningu Kristínar Gunnlaugsdóttur og Elínar S.M. Ólafsdóttur Við Suðumark  í Listasal Mosfellsbæjar lýkur einnig um helgina. Þar má sjá hrá og fersk verk Elínar og risastór útsaumsverk Kristínar.

Einstök útskurðarverk Gauta Ásgeirssonar og útsaumsverk Guðrúnar Bergsdóttir er hægt að sjá í Þjóðminjasafninu um helgina. En sýningu þeirra NÁL OG HNÍFUR  lýkur sunnudaginn 13.maí. Á Þjóðminjasafninu má einnig sjá sýninguna 8 heimar, sýning nemenda við Myndlistaskólann í Reykjavík.

 Sýning Ásgeirs Vals Sigurðssonar stendur yfir hjá samtökunum ´78 við Laugaveg 3. Henni lýkur 12.maí.

Á landsbyggðinni má sjá fjölbreytta sýningar. Á Egilsstöðum er sýningin Betri bær- List án landamæra í Sláturhúsinu Menningarmiðstöð.

  Í menningarmiðstöð Þingeyinga á Húsavík er sýning á mósaíverkum notenda Miðjunnar.

Í Hofi á Akureyri stendur yfir sýning Skógarlundar og Fjölmenntar og Ull og endurvinnsla er í geðræktarmiðstöðinni Setrinu á Húsavík.

Ekki missa af frábærum sýningum og viðburðum!!!! Kíkið í dagskrána hér á síðunni  og grípið tækifærið og sjáið verk eftir frábært listafólk.

Endilega kíkið á mynda og upplýsinga síðu Listar án landamæra á Facebook.

Svokallaða ,,LIKE'' síðu.  Þar er mikið af myndum frá List án landamæra í gegnum árin og við setjum inn myndir frá viðburðum á dagskrá hátíðarinnar 2012 smátt og smátt.

Hér er slóðin á Like síðuna: http://www.facebook.com/pages/List-%C3%A1n-landam%C3%A6ra/329690037048895

Vinasíðan okkar er fullbókuð en hægt er að verða s.k. áskrifandi að síðunni.

Atli Viðar og góður gestur á opnun sýningarinnar Skjaldarmerkið hennar Skjöldu í Hafnarborg.

Allt listafólk og skipuleggjendur geta verið verulega stolt af verkum sínum!

 Framundan í vikunni eru nokkrir skemmtilegir viðburðir:

- Þriðjudaginn 8.maí er tónleikar Fjölmenntar í Reykjavík í Salnum í Kópavogi kl.18 (6).

- Fimmtudag og föstudag 10 og 11 mái er opið hús og myndlistasýning í Skógarlundi á Akureyri. frá hálf 10 - hálf 4 báða dagana.

- Við Suðumark sýning Kristínar Gunnlaugsdóttur og Elínar S.M. Ólafsdóttur í Listasal Mosfellsbæjar hefur verið framlengd til laugardagsins 12.maí

 - Hönnun fyrir börn stendur yfir hjá Handverki og hönnun í Aðalstrætinu í Reykjavík. Sýningarlok eru 16.maí.

- Sýning Ásgeirs Vals stendur yfir hjá samtökunum ´78´við Laugaveg 3. Henni lýkur 12.maí

- Sýninguna Lækjarliti má sjá í Café Aroma. Sýningunni lýkur miðvikudaginn 9.maí.

- Sýningu Gauta Ásgeirssonar og Guðrúnar Bergsdóttir NÁL OG HNÍFUR í Þjóðminjasafninu lýkur sunnudaginn 13.maí

- Sýningunni Fólk í mynd í Norræna húsinu lýkur einnig á sunnudaginn. En á laugardaginn verður Vatnsmýrarhátíð og leiðsögn um sýninguna.

- Smiðja verður í Norræna húsinu á laugardag og sunnudag frá 12-16 (12-4).

- Sýning nemenda í Fjölmennt stendur til 16.maí í húsnæði Fjölmenntar við Vínlandsleið 14.

- Á Egilsstöðum er fjölbreytt sýning í Sláturhúsinu Menningarmiðstöð

- Í menningarmiðstöð Þingeyinga á Húsavík er sýning á mósaíverkum notenda Miðjunnar.

- Í Hofi á Akureyri stendur yfir sýning Skógarlundar og Fjölmenntar

- Ull og endurvinnsla er í geðræktarmiðstöðinni Setrinu á Húsavík.

 Ekki missa af frábærum sýningum og viðburðum!!!! Kíkið í dagskrána hér hægra megin á síðunni og sjáið nánar um viðburðina.

 Á Laugardaginn er opnunarhátíð á Austurlandi. Fjölbreytt og skemmtileg dagskrá á sviði, kaffi, sýningar og leiksýning um kvöldið. Kíkið á dagskrána í dagskrárbæklingnum eða í skránni sem er í viðhengi með þessari færlsu.

Brúðkaupsdraumur í Frumleikhúsinu
og fjölmenningardagur í Duus húsum í Reykjanesbæ.

Tónstofan í Hörpu
Tónstofa Valgerðar býður uppá  tónleika í Hörpuhorninu, laugardaginn 5. maí kl: 15:00 (3). Hörpuhornið er staðsett á annarri hæð við hliðina á Eldborgarsalnum.

Á tónleikunum leika nemendur Tónstofunnar.  Bjöllukórinn, einleikarar og söngvarar munu flytja íslensk og erlend þjóðlög, dægurlög og klassíska tónlist.

Smiðja í Norræna húsinu
Listamaðurinn Magnús Helgason mun leiða nýstárlega smiðju ætlaða allri fjölskyldunni í tengslum við sýninguna Fólk í mynd. Á smiðjunni skoðum við okkur sjálf og myndina af okkur. Smiðjan er opin 12.00-16.00

Fjöldi sýninga er opinn um allt land!

Nál og hnífur og 8 heimar í Þjóðminjasafninu

Við Suðumark í Listasal Mosfellsbæjar

Fólk í mynd í Norræna húsinu

Ásgeir Valur í samtökunum ´78

Lækjarlitir í Kaffi Aroma

Hlutskipti/Hugskeyti í Vin

Sýning í Hofi á Akureyri

Njótið helgarinnar!

Í gær, þriðjudag 3.maí,  var haldin árleg Söngkeppni Tipp Topp.
26 keppendur tóku þátt í keppninni sem heppnaðist vel í alla staði.

Tara Þöll Danielsen Imsland, sigurvegari frá því í fyrra og keppandi í Eurosong á Írlandi fyrir hönd Íslands, sat í dómnefnd ásamt þeim Önnu Katrínu Þórarinsdóttur, söngkonu í Húsbandi Hins Hússins og Eysteini Sigurðssyni, leikara og starfsmanni Hins Hússins.

Atkvæði úr salnum giltu hlutfallslega á móti mati dómnefndar. Veitt voru verðlaun fyrir fyrstu 3 sætin og sérstök verðlaun voru veitt fyrir atriði sem höfðu mjög mikið skemmtanagildi.

Í fyrsta sæti varð Helgi Fannar með lagið Sweet Transvestide úr Rocky Horror söngleiknum. Í öðru sæti varð Marta Sóley Helgadóttir með lagið Mundu mig með Jóhönnu Guðrúnu og því þriðja lenti Erla Kristín með lagið Snert Hörpu mína. Sérstök verðlaun fyrir skemmtilegasta atriðið fékk Elín Björk sem flutti lagið Jón er kominn heim.

Dómnefnd tók það fram að það hefði verið mjög erfitt að velja sigurvegara og að mörg atriði hefðu verið einstaklega vel flutt. Keppendur sem túlkuðu textann á sinn hátt, dönsuðu vel og voru með frumlegan flutning.

Í kvöld er söngkeppni Tipp Topp í Hinu Húsinu.

 Kíkið á dagskrána:  http://issuu.com/hitthusid/docs/lal2012?mode=window&viewMode=doublePage

1. maí, þriðjudagur.

Geðveikt kaffihús Hugarafls og handverksmarkaður í Hinu húsinu
Tími: 13 – 17 (13-5)
Hitt húsið, Pósthússtræti 3-5, 101 RVK
www.hugarafl.is, www.asgardur.is,
Athugið að hjólastóla inngangur er um port Hafnarstrætismegin!

Á Geðveiku kaffihúsi er kaffið klikkað og baksturinn brjálæðislega góður. Boðið er upp á jákvæðar geðgreiningar og skemmtiatriði.
Glæsilegt handverk og listmunir verða til sölu á handverksmarkaði. Iðjuberg, Ásgarður og Bjarkarás bjóða glæsilegar vörur sínar til sölu.
Hrós, knús og jákvæðar hugsanir í boði fyrir gesti og gangandi. 

30. apríl, mánudagur.

Blómstrandi list og söngsveitin Plútó í Fjölmennt
Tími: 17-18:30 (5-hálf 7)
Fjölmennt, Vínlandsleið 14
www.fjolmennt.is

Í Fjölmennt, símenntunar og þekkingarmiðstöð, eru margir við nám í skapandi greinum. Í dag opnar sýning á verkum nemenda í listgreinum og hin frábæra söngsveit Plútó ætla að syngja fyrir gesti og gangandi. Allir velkomnir!

 Sýnendur eru: Rut Ottósdóttir, Kristján Kristjánsson, Magnús Ragnarsson, Halldóra María Skowro, Linda Rós Lúðvíksdóttir, Sigríður Hrefna Sigurðardóttir, Halla Kjartansdóttir, Ragnhildur Bjarnadóttir, Dagný Harðardóttir, Ingibjörg Emma Guðmundsdóttir, Ingvar Þór Ásmundsson, Gísli Steinn Guðlaugsson, Björgvin Axel Ólafsson, Lilja Valgerður Jónsdóttir, Andri Guðnason, Gísli Steindór Þórðarson, Ragnar Már Ottósson, Birna Gunnarsdóttir, Edith Thorberg, Hafdís Matthíasdóttir, Anna Sveinlaugsdóttir, María Strange, Elín S. M. Ólafsdóttir, Bjarni Haraldur Sigfússon og Gréta Guðbjörg Zimsen. 

Um helgina er hægt að njóta fjölbreyttra viðburða á dagskrá Listar án landamæra.

Í færslunni hér á undan er góð lýsing á sýningunni Fólk í mynd í Norræna húsinu sem opnar laugardaginn 28.apríl klukkan 15 (3).

Sýningarlok eru á sýningunni Þrívídd í Ráðhúsi Reykjavíkur. Þar má líta gullfallegar litlar kindur, Risastórt hrafnshreiður og alla vega 2 krumma, fugla og furðufugla og trjáfólk úr Álafosskvosinni ásamt fleira af gullfallegum listaverkum. Mælt er með að fólk skoði hana á Laugardeginum en á sunnudaginn er hætt við að mikið verði af fólki í Ráðhúsinu í e.k. móttöku, 

 Sýningin heitir ,,Fólk í mynd'' og er portrett sýning.

Áhugavert er að sjá hvernig hópur íslenskra listamanna nálgast portrett hefðina. Þau vinna með fjölbreytta tækni, útfrá ólíkum forsendum en að sama viðfangsefni.

Á sýningunni má sjá video portrett Snorra Ásmundssonar, Topp 10, verk eftir Bergþór Morthens þar sem sjá má þekkt andlit úr stjórnmálunum. Gígja Thoroddsen málar líka fræga og má sjá mynd af Haffa Haff og Michael Jackson ásamt mynd af geðlæknum í partýi. Aron Kale sýnir rauðhærða lögreglukonu og Sigga í Bónus, Erla Björk Sigmundsdóttir er ofursterk og saumar myndir í striga og býr til hnausþykka skúlptúra úr ull og garni. Hermann Guðjónsson smyrnar verk úr samfélagsumræðunni. Á sýningunni má sjá splunkunýtt verk af ófrískum Jóni Gnarr borgarstjóra. Hulda Vilhjálmsdóttir sýnir ný verk, yndis fögur verk af konum. Ísak Óli er með nýja seríu af áhugaverðu fólki og má þar nefna Hauk Morthens, Harald veðurfræðing, Evu Sólan, Tove Janson og Helga Hós. Kristján Ellert Arason saumar í striga og sýnir hér verk af Elton John, James Bond, Madonnu og söngvara Bay city Rollers sem er í miklu uppáhaldi hjá honum. Ólöf Dómhildur sýnir djúphugul ljósmyndaverk og Sigrún Huld Hrafnsdóttir sýnir einstök portrett verk.

Á opnuninni ætlar listafólkið að troða upp og láta ljós sitt skína.

Um helgar fá gestir að spreyta sig á portrettinu í skemmtilegri smiðju og fá að gera sín eigin portrett undir handleiðslu listamanns. Eitthvað sem hentar allri fjölskyldunni. Þar verður sjónum beint að okkur, hvaða orð lýsa okkur og hvernig sjáum við okkur.

Opið er frá 12.00 - 17.00 þriðjudaga – sunnudaga og stendur sýningin til sunnudagsins 13. maí.

 Klukkan 17 (5) í dag verða þær Kristín Gunnlaugsdóttir og Elín Sigríður María Ólafsdóttir í Víðsjá á Rás1. Þær Kristín og Ella sýna í Listasal Mosfellsbæjar og heitir sýning þeirra VIÐ SUÐUMARK
Myndir frá sýningunni má sjá í albúmi hér á síðunni.